Sali Berisha, kryetar i Partisë Demokratike të Shqipërisë, zhvilloi një takim të rëndësishëm dje me Dolors Montserrat, Sekretare të Përgjithshme të Partisë Popullore Evropiane (EPP) dhe Patrick Voller, Drejtor për Marrëdhëniet me Jashtë. Gjatë këtij takimi, Berisha theksoi se Shqipëria ka përfunduar si “narko-shteti i parë dhe i vetëm në Evropë”, duke e lidhur këtë realitet me lehtësimin e mbjelljes së kanabisit nga kryeministri Edi Rama në vitin 2015.
Berisha argumentoi se, si pasojë e këtij vendimi, Shqipëria është shndërruar në një qendër globale për kultivimin dhe trafikun e narkotikëve, duke u renditur e para në Europë dhe në vendin e 6–7 në botë për eksportet e kanabisit, sipas të dhënave ndërkombëtare. Ai kritikoi qeverinë për fuqizimin e grupeve kriminale dhe për përhapjen e aktivitetit të paligjshëm, i cili kapi çdo sektor të shoqërisë, përfshirë ekonominë dhe administratën publike. Berisha solli në vëmendje prova nga hetimet ndërkombëtare si Sky ECC dhe EncroChat, që konfirmojnë përmasat e krimit të organizuar në Shqipëri.
Në të njëjtën linjë, Berisha theksoi fenomenin e emigracionit të masiv shqiptar, duke përmendur se mbi 1,099,000 qytetarë kanë braktisur vendin, sipas të dhënave të EUROSTAT. Ai e shpjegoi këtë largim si pasojë e dështimit të regjimit për të ofruar një alternativë demokratike dhe për të siguruar zgjedhje të ndershme.
Montserrat, në këtë takim, shprehu shqetësimin për situatën aktuale në Shqipëri dhe e siguroi Berishën për mbështetje të plotë nga PPE, duke kërkuar zhvillimin e zgjedhjeve të lira dhe rikthimin e demokracisë. Berisha ripërsëriti angazhimin e Partisë Demokratike për të mbështetur procesin e integrimit europian, përmirësimin e demokracisë dhe përballjen me krimin e organizuar. Gjithashtu, ai ishte i shoqëruar nga deputetët Albana Vokshi dhe Belind Këlliçi të PD.
