Ministrja e Shëndetësisë dhe Mirëqenies Sociale, Evis Sala, mori pjesë në një konferencë të nivelit të lartë të organizuar nga qeveria italiane dhe OSBE, e cila ishte e dedikuar problemeve të femicidit, një nga shkeljet më të rënda të të drejtave të njeriut. Gjatë sesionit ministror, ajo diskutoi fenomenin e femicidit në Shqipëri, hapat e ndërmarrë deri më tani, si dhe sfidat që kërkojnë veprime të menjëhershme.
Ministrja theksoi se femicidi është një emergjencë shëndetësore publike dhe një çështje e drejtësisë sociale. Ajo përmendi investimet në kapacitetet e profesionistëve të vijës së parë, për t’i ndihmuar ata të identifikojnë shenjat e hershme të dhunës. Gjithashtu, vuri në dukje rëndësinë e të dhënave të sakta dhe ndërtimin e mekanizmave institucionalë për parandalimin e femicidit.
Një prej nismave që u prezantua ishte Observatori i Femicidit, i ngritur në mars 2024 nga Avokati i Popullit me mbështetje nga UN Women Albania. Ky është mekanizmi i parë i këtij lloji në Ballkan dhe ndër të paktët në Evropë. Sala nënvizoi krijimin e ekipeve multidisiplinare në çdo bashki, si dhe zgjerimin e strehëzave dhe shërbimeve të mbështetjes për të mbijetuarit nga femicidi.
Ajo bëri thirrje për bashkëpunim të thelluar rajonal, duke theksuar se femicidi nuk njeh kufij, dhe se gratë e trafikuara dhe ato nga grupet vulnerabël janë më të rrezikuarat. Ministrja u angazhua se çdo sinjal rreziku do të trajtohet me urgjencë dhe se zëri i çdo gruaje do të dëgjohet dhe mbrohet.
Sala përgëzoi Italinë për propozimin e femicidit si vepër të posaçme penale dhe OSBE-në për punën e saj në standardizimin e të dhënave dhe sistemet e paralajmërimit të hershëm. Ajo theksoi se gjatë dekadës së fundit, Shqipëria ka punuar intensivisht për të harmonizuar legjislacionin dhe politikën me standardet ndërkombëtare, përfshirë Konventën e Stambollit dhe rekomandimet e organizatave ndërkombëtare.
