Presidenti ukrainas Volodymyr Zelensky ka zhvilluar një bisedë telefonike me zëvendëspresidentin amerikan J.D. Vance për të diskutuar planin e Shteteve të Bashkuara për të përfunduar luftën në Ukrainë. Zelensky i ka shprehur administratës Trump gatishmërinë për të negociuar, ndërsa Shtëpia e Bardhë, së bashku me Trumpin, kërkon që plani të nënshkruhet deri më 28 nëntor, në Ditën e Falënderimeve.
Plani, që përfshin 28 pika, do të detyronte Ukrainën të heqë dorë nga territorët shtesë, të pranojë që të mos bashkohet kurrë me NATO-n dhe të ofrojë amnisti të plotë për rusët të akuzuar për krime lufte. Shtetet e Bashkuara, së bashku me vendet evropiane, ofrojnë garanci sigurie që janë të ngjashme me Nenin 5 të NATO-s, i cili do të angazhojë aleatët ta konsiderojnë çdo sulm ndaj Ukrainës si një sulm ndaj tërë “komunitetit atlantik”.
Më herët gjatë ditës, Zelensky ka mbajtur një telekonferencë me liderët e Gjermanisë, Francës dhe Britanisë për të diskutuar detaje të mëtejshme mbi planin.
