Ministrja e Brendshme, Albana Koçiu, ka inspektuar urën e dëmtuar në fshatin Xhyre, në Librazhdi, pas reshjeve të fundit që shkaktuan probleme serioze në infrastrukturën rrugore të zonës. Ajo theksoi rëndësinë e gjetjes së zgjidhjeve të shpejta për lëvizjen e 1700 banorëve të këtij fshati.
Ura e Shëmrizës ka pësuar dëmtime në njërin krah, duke e vështirësuar kalimin për mjetet. Po ashtu, në aksin Kodovjat–Mashan, një masiv dheu ka rënë, duke bllokuar rrugën kryesore. Sipas informacioneve, firma e mirëmbajtjes ka marrë njoftim dhe ekipet janë nisur për të pastruar dhe hapur rrugën e bllokuar.
Autoritetet vazhdojnë të monitorojnë situatën dhe i bëjnë thirrje qytetarëve të shmangin lëvizjet e panevojshme në zonat e rrezikuara, duke siguruar kështu mbrojtjen e jetës dhe pasurive të tyre.
