Edi Rama zhvilloi një takim të mbyllur më shumë se 7 orë me Belinda Ballukun ditën e djeshme në Kryeministri, ku sipas burimeve të portalit Timoni.al ai i kërkoi sërish dorëheqjen pas masës së pezullimit të vendosur nga GJKKO. Situata është tensionuar edhe më shumë, pasi SPAK pritet shumë shpejt të kërkojë edhe arrestimin e zëvendëskryeministres, gjë që e ka vënë kryeministrin përballë një krize të hapur politike.
Në kushtet kur presioni publik e institucional po rritet, Rama ka gjetur tashmë zëvendësuesen e Ballukut, Ogerta Manastirliun, një nga figurat më të besuara të tij. Edhe pse Manastirliu është zyrtarisht kandidate e Partisë Socialiste për Bashkinë e Tiranës për zgjedhjet e vitit 2027, burimet thonë se ajo është e gatshme të marrë menjëherë drejtimin e Ministrisë së Infrastrukturës dhe postin e zëvendëskryeministres, nëse kjo do t’i shërbejë stabilizimit të qeverisë së Ramës.
Ndërkohë, Balluku vazhdon të përballet me përplasjen më të fortë politike dhe ligjore të karrierës së saj. Vetëm një ditë para vendimit të pezullimit, ajo sfidoi opozitën nga foltorja e Kuvendit, duke i quajtur akuzat penale “baltë” dhe “gënjeshtra”. Por në të njëjtën kohë që ajo fliste me tone triumfaliste, gjyqtari Erjon Çela në GJKKO po shqyrtonte kërkesën e SPAK për ta pezulluar nga detyra, kërkesë që u pranua dhe u publikua të enjten.
Vendimi i gjykatës jo vetëm e largon Ballukun nga çdo funksion shtetëror, por i ndalon edhe daljen jashtë vendit duke i bllokuar pasaportën. Ajo është marrë e pandehur dy javë më parë për “shkelje të barazisë në tendera” në lidhje me procedurën 18.9 miliardë lekë të tunelit të Llogarasë, ndërkohë që komunikimet e zbardhura tregojnë se ajo ka kontrolluar hap pas hapi të gjithë procesin dhe ka paracaktuar fituesin në kundërshtim me kriteret standarde të prokurimit publik.
Rasti i Ballukut përbën një precedent të paprecedentë në politikën shqiptare, është hera e parë që një zyrtar i rangut kaq të lartë të qeverisë shpallet i pandehur ndërsa është në detyrë dhe më pas pezullohet me urdhër të gjykatës. Më herët, gjatë qeverisjes socialiste që prej vitit 2011, figura të rëndësishme të PS janë marrë të pandehur vetëm pasi kanë lënë funksionet publike.
Në listë përfshihen ish-zëvendëskryeministri Arben Ahmetaj, i shpallur në kërkim, ish-ministri Lefter Koka, ish-deputeti Alqi Bllako, ish-ministri Ilir Beqja dhe disa deputetë të tjerë. Ndërkohë, në paraburgim ndodhet edhe kryebashkiaku i Tiranës, Erion Veliaj, i akuzuar për korrupsion dhe pastrim parash.
Megjithëse qeveria socialiste është goditur vazhdimisht nga skandale të rënda korruptive, Edi Rama nuk ka marrë asnjëherë përgjegjësi politike për dështimet e bashkëpunëtorëve të tij, duke i cilësuar rastet si “përgjegjësi personale”, ndërkohë që PS arriti të marrë mandatin e katërt radhazi në zgjedhjet e 11 majit.
Por dobësia e opozitës ka luajtur rol vendimtar, edhe ajo është përfshirë në kriza të thella, ndërsa liderët e saj kryesorë, Sali Berisha dhe Ilir Meta, janë nën hetim dhe akuzë për korrupsion, duke e bërë të vështirë rikrijimin e një alternative të besueshme për votuesit. Ekspertët e politikës thonë se opozita duhet të dalë nga kërkesat e momentit për dorëheqje të Ramës dhe zgjedhje të parakohshme, dhe të ndërtojë një strategji afatgjatë që mund të sfidojë realisht pushtetin e konsoliduar të socialistëve.
