Me shpalljen e zgjedhjeve të jashtëzakonshme më 28 dhjetor, aktivizohet neni 24 i Ligjit për menaxhimin e financave publike, që mundëson një zgjatje buxhetore për pagat e sektorit publik edhe për dy muaj pas vitit të ri fiskal. Kjo zgjatje do të mundësohet në rast se zgjedhjet e përgjithshme mbahen më pak se katër muaj para 1 janarit.
Sipas këtij ligji, buxheti i ndarë për çdo organizatë buxhetore do të jetë i barabartë me 16.67% të ndarjes buxhetore nga ligji i ndarjeve buxhetore. Më 20 nëntor, presidentja e Kosovës, Vjosa Osmani, shpalli datën 28 dhjetor për zgjedhjet, pas dy dështimeve të deputetëve për të zgjedhur një ekzekutiv të ri.
Osmani organizoi konsultime me partitë politike, por nuk arritën të bien dakord për një seancë që do të miratonte zgjatjet buxhetore, ratifikimin e marrëveshjeve ndërkombëtare, si dhe buxhetet për tri komuna dhe për Radio Televizionin e Kosovës. Kosova po hyn në vitin 2026 pa miratimin e buxhetit shtetëror, edhe pse Qeveria në detyrë, e udhëhequr nga Albin Kurti, kishte paraqitur një projektligj për buxhetin.
Partitë që ishin në opozitë gjatë mandatit të kaluar e kritikuan këtë veprim, duke e konsideruar të pavlegjshëm dërgimin e projektligjit nga Kurti në Kuvendin e ri. Presidentja Osmani ka shprehur disa herë shqetësim për këtë situatë, duke theksuar rrezikun që paraqet mosmiratimi i buxhetit për pagat e nëpunësve të sektorit publik, dhe se ishte e gatshme të propozonte një zgjatje buxhetore deri në mars.
Ekspertët e ekonomisë kanë tërhequr vëmendjen për një potencial kolaps buxhetor, me paralajmërimin se vendi për herë të parë mund të “mbyllej” pa mundësi për të paguar shërbime. Kjo situatë e vështirë financiare ngre shqetësime të mëdha për stabilitetin ekonomik të vendit.
