Porti i Durrësit ka përfunduar dhjetëmujorin e parë të vitit me rezultate të shkëlqyera, duke regjistruar rritje në të gjitha treguesit kryesorë. Sipas të dhënave zyrtare, nga janari në tetor të 2025, porti ka përpunuar mbi 3.2 milion tonë mallra, duke shënuar një rritje prej 7.28% në krahasim me të njëjtën periudhë të vitit të kaluar, përkatësisht rreth 219 mijë tonë më shumë.
Nga ky total, 2,442,518 tonë kanë qenë mallra të importuara, ndërsa 783,478 tonë mallra janë eksportuar në tregjet ndërkombëtare. Rritja e importeve me 27% tregon një kërkesë të rritur të brendshme, duke evidentuar rolin e portit si një qendër jetike për furnizim dhe shpërndarje.
Sektori i konteinerëve gjithashtu ka shënuar një rritje të konsiderueshme, me 189,835 TEU të përpunuar, një rritje prej 15% krahasuar me vitin e kaluar. Ky tregues tregon intensifikimin e flukseve të mallrave të konteinerizuara, duke përmirësuar eficiencën e zinxhirit të furnizimit.
Lëvizja e pasagjerëve po ashtu ka mbetur në rritje, me 694,310 udhëtarë që kanë përdorur portin nga janari deri në tetor, duke u rritur me 11,597 më shumë se vitin e kaluar. Prej tyre, 325,507 pasagjerë kanë hyrë në Shqipëri, ndërsa 368,803 kanë udhëtuar për në porte italiane, duke treguar një rritje prej 5%.
Gjatë këtij periudhe, kanë kaluar gjithashtu 1,764 anije tregtare dhe mjete të tjera lundruese, duke reflektuar një intensitet operativ dhe kapacitet të rritur përpunimi.
SipasAPD-së, “Durrësi vijon të mbetet nyja më e rëndësishme detare dhe logjistike e Shqipërisë”, duke u angazhuar për të përmbushur kërkesat e tregut me standarde të larta operative, dhe duke kontribuar në zhvillimin ekonomik të vendit. Porti po afron gjithashtu Shqipërinë me rrjetet rajonale dhe ndërkombëtare të transportit.
