Ambasada e Kinës në Athinë ka shprehur një reagim të ashpër ndaj deklaratave të ambasadores amerikane, Kimberly Guilfoyle, e cila kritikoi kalimin e portit të Pireut në duar të kolosit kinez COSCO, duke e quajtur këtë fakt “të pafat”. Ajo sugjeroi se Greqia duhet të shqyrtojë mundësinë e shitjes së portit për të balancuar ndikimin kinez.
Përfaqësia diplomatike kineze e cilësoi këtë deklaratë si një ndërhyrje të papranueshme në çështjet e brendshme të Greqisë dhe një përpjekje për të minuar bashkëpunimin ekonomik mes dy vendeve. Zëdhënësi i ambasadës theksoi se komentet e Guilfoyle janë “sulme të pabazuara” dhe pasqyrojnë një mentalitet të Luftës së Ftohtë. Sipas tij, SHBA-të po përpiqen të shfrytëzojnë portin e Pireut dhe Greqinë për qëllime gjeopolitike.
Pekini kujton se bashkëpunimi mes Kinës dhe Greqisë është ndërtuar mbi mbështetje të ndërsjellë dhe se investimi i COSCO-s ka transformuar Pireun në një port të rëndësishëm të Mesdheut, duke krijuar dhjetëra mijëra vende pune. Ambasada nënvizon se “porti i Pireut i përket përgjithmonë popullit grek”.
Ky reagim vjen në një kohë kur rivaliteti gjeopolitik mes SHBA-ve dhe Kinës është intensifikuar, veçanërisht pas lëvizjeve të fundit të Uashingtonit në portin e Elefsinës. Ambasadorja Guilfoyle, në takimet e saj me ministrin grek të Zhvillimit, Takis Theodorikakos, përfundoi një marrëveshje për zgjerimin e aktiviteteve të kompanisë amerikane ONEX në Elefsinë, me mbështetje nga banka shtetërore amerikane e zhvillimit, DFC.
Kjo marrëveshje lejon rritjen e investimeve amerikane dhe shndërrimin e portit në një qendër strategjike për ndërtimin dhe mirëmbajtjen e anijeve, duke krijuar një pol ekonomik me prani të fortë amerikane. Miratimi i saj pritet nga parlamenti grek brenda disa ditësh.
Ky zhvillim ka një rëndësi të madhe jo vetëm ekonomike, por shihet gjithashtu si një tentativë për të kundërpeshuar ndikimin e COSCO-s dhe investimet kineze në portet e tjera të Greqisë, duke e vendosur Greqinë në qendër të një gare ndikimi mes dy superfuqive.
