Ish-sulmuesi brazilian Jo (Joao Alves de Assis Silva) është arrestuar në Rio de Janeiro për mospagim të detyrimeve për mirëmbajtjen e fëmijës. Arrestimi i tij, më 18 nëntor, ndodhi gjatë një barbecue në Barra da Tijuca, ku policia e identifikoi pas lëshimit të një urdhri ndalimi për moskryerjen e pagesave.
Urdhri për arrestim ishte i lidhur me një borxh prej rreth 220,744.57 realësh brazilianë (rreth 31,500 paund) të dokumentuar për vitin 2024. Ky është arrestimi i katërt i Jo-s për të njëjtën çështje. Futbollisti, i cili së fundmi ka luajtur për ekipin e kategorisë së katërt Itabirito, ka një fëmijë me influenceren Maiara Quiderolly, me të cilën pati një lidhje jashtëmartesore gjatë martesës së tij me Claudia Silva.
Nga kjo lidhje ka lindur Joao Gabriel, fëmija i tetë i ish-sulmuesit dhe i gjashti jashtë martese. Lidhja mes çiftit përfundoi pasi Quiderolly mbeti shtatzënë. Në vitin 2024, Jo u arrestua gjithashtu pasi zbriti nga autobusi i skuadrës së tij për të njëjtën arsye dhe u mbajt gjatë natës në komisariatin e Campinas.
Avokati i tij, Artur Eugenio Matias, deklaroi se urdhri ishte lëshuar për një borxh relativisht të vogël dhe se ai pret që klienti i tij të lirohet pas pagesës së borxhit. Pas pagesës, Jo u la i lirë.
Gjatë karrierës së tij, Jo ka luajtur për skuadra të njohura si Manchester City, Everton, Corinthians dhe Atletico Mineiro, duke regjistruar gjithsej 20 paraqitje me kombëtaren braziliane, me pesë gola të shënuar. Ai ishte pjesë e ekipit në Botërorin 2014, ku Brazili pësoi humbjen e rëndë 1-7 ndaj Gjermanisë.
