Polonia ka intensifikuar masa sigurie duke dërguar avionë luftarakë në hapësirën e saj ajrore dhe duke mbyllur përkohësisht dy aeroporte, për shkak të sulmeve të reja ruse me raketa dhe dronë në Ukrainë. Këto sulme, të cilat u përqendruan në pjesët perëndimore të Ukrainës dhe afër kufirit me Poloninë, kishin pasoja të rënda. Dhjetëra njerëz u plagosën në Kharkiv, ku dronët shkatërruan ndërtesa banimi dhe shkaktuan zjarr në automjete. Shumë rajone në Ukrainë mbetën pa energji elektrike pas goditjeve ndaj infrastrukturës energjetike.
Për të mbrojtur hapësirën e saj ajrore, Polonia aktivizoi avionë luftarakë dhe aeroplanë paralajmërimi, duke ngritur çifte avionësh të reagimit të shpejtë. Komanda operacionale polake theksoi se sistemet e mbrojtjes ajrore dhe radarët janë në gjendje gatishmërie më të lartë. Aeroportet Rzeszow dhe Lublin u mbyllën për të siguruar lirinë e operimit të aviacionit ushtarak, por pas pak kohësh u hapën përsëri.
Sulmet ruse ndodhen vetëm disa orë pas vizitës së Presidentit ukrainas Volodymyr Zelensky në Turqi, ku ai u takua me homologun Recep Tayyip Erdogan për të biseduar mbi rifillimin e negociatave për paqen dhe shkëmbimin e ushtarëve të marrë peng. Rusia nuk është pjesë e këtyre diskutimeve, ndërsa Turqia ka marrë rolin e ndërmjetësuesit.
Aleatët e NATO-s kanë rritur fluturimet e avionëve luftarakë muajt e fundit për të parandaluar sulme dhe për të mbrojtur kufijtë e tyre. Polonia ka qenë veçanërisht e shqetësuar për situatën, duke u treguar e gatshme për çdo situatë. Në shtator, avionë polakë shkatërruan dronë rusë që kishin depërtuar në hapësirën ajrore të vendit, një incident që NATO e përshkroi si “shumë të rrezikshëm”. Ky ishte gjithashtu hera e parë që NATO-ja ndërmori veprime ushtarake ndaj objektivave gjatë konfliktit në Ukrainë.
