Ministri i Mbrojtjes, Pirro Vengu, së bashku me prefektin Tauland Malshi, zhvilloi një takim me Shtabin e Emergjencave në Lezhë për të analizuar situatën e reshjeve dhe masat e nevojshme. Vengu vuri në dukje se situata mbetet dinamike dhe strukturat janë në angazhim maksimal, duke kërkuar mjete shtesë.
Forca të ushtrisë janë dislokuar në Kurbin, zonën më të prekur, si dhe në Lezhë për të parandaluar përkeqësimet. Ndërhyrjet përfshijnë riparimin e tre urave të dëmtuara. Në Bashkinë e Lezhës, katër familje janë evakuuar dhe aktualisht po strehohen në konviktin e shkollës profesionale. Po ashtu, në lagjen “Sake”, disa banesa janë në rrezik, por ndërhyrjet kërkojnë miratimin e Ministrisë për shkak të mbrojtjes së zonës.
Situata kritike është evidentuar edhe në Kallmet, ku rezervuari ka arritur nivelin maksimal. Problematika raportohen gjithashtu në Dragushë e Dajç, ku kanalet e ujërave të larta përbëjnë rrezik për përmbytje nëse reshjet vazhdojnë. Në Kurbin, një familje është evakuuar në fshatin Gjorm, ndërsa situata në Mirditë është më e qetë, megjithatë ka rrëshqitje dhe prani inertesh në disa rrugë rurale.
Drejtoria Rajonale e Ujitjes dhe Kullimit njoftoi se hidrovoret funksionojnë me kapacitet të plotë dhe pa probleme. Janë bërë ndërhyrje në kanalet kulluese të Kurbinit dhe Zadrimës për të parandaluar përkeqësimin e situatës. Ndërsa, OSHEE raportoi ndërprerje të energjisë në mëngjes, tashmë furnizimi është rikthyer pas ndërhyrjeve teknike.
Policia e Lezhës ka intensifikuar patrullat në akset me rrezik për të kufizuar qarkullimin dhe për të garantuar mbarëvajtjen e lëvizjes. Në fund, ministri Vengu tha se është e nevojshme vazhdimi i gatishmërisë së plotë të të gjitha strukturave, pasi reshjet pritet të vazhdojnë.
