Ylli brazilian Estevao Willian ka tërhequr vëmendjen e mediave pas kritika të ashpra nga trajneri Carlo Ancelotti gjatë grumbullimit të kombëtares për ndeshjet e tetorit. Sipas raporteve nga Globo Esporte, incidenti ka ndodhur kur 18-vjeçari ka refuzuar të zbatojë disa herë udhëzimet taktike të trajnerit gjatë një stërvitjeje.
Ancelotti i ka adresuar një paralajmërim të drejtpërdrejtë lojtarit përpara skuadrës, duke i thënë: “Unë flas vetëm një herë. Ose bën atë që të them, ose del nga ekipi.” Ky mesazh erdhi pasi Estevao nuk ushtroi presion ndaj mbrojtësit kundërshtar, siç ishte kërkuar.
Megjithatë, reagimi i Estevaos pas këtij tensioni ka qenë pozitiv. Ai shënoi një dopietë në fitoren 5-0 ndaj Koresë së Jugut dhe u aktivizua përsëri në ndeshjen ndaj Japonisë. Fundjavën e kaluar, ai shënoi golin e katërt me kombëtaren në vetëm 10 paraqitje, gjatë fitores 2-0 ndaj Senegalit në “Emirates Stadium”.
Estevao, i transferuar te Chelsea këtë verë nga Palmeiras për një shumë që arrin deri në 56 milionë paund, po kalon një sezon të suksesshëm, si me klubin ashtu edhe me kombëtaren. Ai ka regjistruar 16 paraqitje dhe 4 gola me Chelsea, duke u bërë një nga lojtarët kyç të skuadrës që është vetëm gjashtë pikë larg kreut të Premier League.
Marrëdhënia mes Estevaos dhe Ancelottit duket të jetë shumë e mirë. Vetë lojtari ka zbuluar se trajneri i ka dhënë një ditë pushim për të kryer provimin e patentës në Brazil.
Estevao pritet të jetë në garë për një vend titullari në ndeshjen e radhës të Brazilit ndaj Tunizisë, përpara se t’i bashkohet Chelsea-t për sfidën ndaj Burnley-t këtë të shtunë.
