Autoritetet kanë shpallur në kërkim 31-vjeçarin Ervis Lami dhe kanë arretuar Jeton Lamin si të dyshuar dhe të përfshirë në ekzekutimin e të riut Klaudio Prendi, djalit të ish-gjyqtarit Fran Prendi. Ngjarja tronditi kryeqytetin në orët e para të 19 nëntorit, kur Prendi u qëllua me breshëri sapo kishte dalë nga një lokal në zonën e Xhamllikut.
Viktima humbi jetën në spital
Rreth orës 01:40, i riu po hipte në automjetin e tij kur persona ende të paidentifikuar hapën zjarr ndaj tij. Pavarësisht mbërritjes së shpejtë në spital, Klaudio Prendi ndërroi jetë si pasojë e plagëve të rënda.
Makina e autorëve, e djegur në Farkë
Pak orë pas atentatit, në zonën e Farkës u gjet një automjet i djegur, i cili dyshohet se është përdorur nga autorët për t’u larguar pas krimit.
Kush është i dyshuari Ervis Lami?
Emri i Ervis Lamit nuk është i panjohur për policinë. Ai konsiderohet person me precedentë të theksuar kriminal dhe ishte shpallur në kërkim edhe në janar të këtij viti, pasi gjatë një kontrolli në banesë iu gjet një automatik me silenciator. Kontrollet asokohe ishin pjesë e hetimeve për identifikimin e autorëve të vrasjes së postierit Lulzim Visha, i ekzekutuar më 24 janar në Kamëz ndërsa ndodhej në automjetin e punës.
Lami dyshohet se mund të ketë lidhje me atentatin ndaj Klaudio Prendit, por përfshirja e tij është ende nën hetim, ndërsa policia po punon për identifikimin e të gjithë personave të përfshirë dhe motivet e ngjarjes.
Forcat e rendit po vijojnë kërkimet intensive në Tiranë dhe zonat përreth. Autoritetet u bëjnë thirrje qytetarëve që të raportojnë çdo informacion që mund të ndihmojë në kapjen e të dyshuarit.
