Nga BILD
Ndërmarrjet e vogla dhe të mesme gjermane po shfaqen gjithnjë e më shumë në skenën ndërkombëtare, teksa humbja e besimit në qeverinë federale i ka shtyrë ato të kërkojnë vetë mundësi jashtë vendit. Sipërmarrësja Sarna Röser, një nga zërat më të fortë të sektorit të NVM-ve, ka ndërmarrë një nismë që po i vendos kompanitë e mesme gjermane në “tryezën botërore”.
Röser kritikoi qartësisht qasjen e politikës gjermane ndaj biznesit të mesëm: “Për vite me radhë, ndërmarrjet e vogla dhe të mesme kanë parë qeverinë me të njëjtët drejtues të vjetër të DAX-it, sikur kjo të ishte e gjithë ekonomia gjermane. Por ata që ndikojnë janë në bizneset e tyre! Në një moment vendosa: mjaft më. Po i sjellim vetë NVM-të gjermane në tryezën botërore – të vendosura, të pavarura dhe në kushte të barabarta”.
Takim i pazakontë me njeriun më të pasur të Azisë
Gjatë vizitës së fundit në Indi, delegacioni i përbërë nga pronarë dhe drejtues të bizneseve nga sektori automobilistik, tekstili, farmaceutik, ndërtimi, logjistika dhe energjia u prit edhe nga Mukesh Ambani (68), kreu i Reliance Industries dhe njeriu më i pasur i Azisë.
Në takimin me Mukesh Ambani kanë marrë pjesë Christian van Daniels, pronar i Van Laack; Michael Schröder, Sarna Röser, sipërmarrëse, anëtare e bordit mbikëqyrës (përfshirë Fielmann, FlatexDEGIRO); Viktoria Vollmann, Vollmann Group; Claudia Rutt, bashkëthemeluese e DKMS; Dorian Ducka, ish-zëvendësministër i Energjisë dhe Industrisë së Shqipërisë.
Forbes e vlerëson pasurinë e tij në rreth 94.8 miliardë euro.
Pritja në nivel të tillë është e rrallë për biznesmenë të mesëm – Ambani zakonisht takim të tilla i rezervon për krerët e shteteve. Sipas Röser, ky interes i jashtëzakonshëm tregon se bota është e gatshme të bashkëpunojë drejtpërdrejt me “shtyllën kurrizore të ekonomisë gjermane”.
“Nuk kemi pse të presim që Berlini të na marrë me vete. Bota ka kohë që po shtron tapetin e kuq për ne; dëshiron të flasë me ne, me ata që po bëjnë vërtet ndryshimin,” tha Röser.
Një qasje e re: veprim, jo pritje
Sipërmarrësja theksoi se delegacionet e saj nuk janë “ture turistike”, por misione konkrete ekonomike:
“Ne krijojmë akses, ndërtojmë aleanca dhe tregojmë se NVM-të mund të kenë ndikim global”.
Deri tani, Röser ka bashkë-organizuar nëntë udhëtime biznesi në vende si Arabia Saudite, Vietnami dhe India, duke synuar hapjen e tregjeve të reja dhe krijimin e lidhjeve të drejtpërdrejta ekonomike. Ajo vlerëson energjinë e ekonomive të reja.
“Këto vende janë të entuziazmuara për të ardhmen! Ato mendojnë në shkallë të gjerë, veprojnë shpejt, besojnë në progres. Pikërisht këtë ka harruar Gjermania”, tha Röser.
Udhëtimet e ardhshme: India, Meksika dhe Arabia Saudite
Agjenda ndërkombëtare e NVM-ve të udhëhequra nga Röser është tashmë e planifikuar. Në pranverë, delegacioni do të rikthehet në Indi për të marrë pjesë në Raisina Dialogue, konferencën më të madhe të sigurisë në Azi, ku Röser synon të zhvillojë takime me liderë politikë dhe ekonomikë.
Meksika dhe Arabia Saudite gjithashtu janë në itinerar, me qëllim zgjerimin e bashkëpunimit dhe gjetjen e partnerëve të rinj për industrinë gjermane të mesme.
Në përfundim të deklaratës së saj për BILD, Röser nënvizoi misionin e saj: “E ardhmja u përket atyre që e formësojnë atë”.
