Ish-i dërguar i Bashkimit Evropian për dialogun Kosovë-Serbi, Miroslav Lajçak, ka pranuar se ka pasur komunikime me financierin Jeffrey Epstein, por i ka cilësuar ato si brenda detyrave të tij diplomatike. Lajçak thekson se informatat për veprimet e Epsteinit u bënë të njohura plotësisht vetëm pas arrestimit të tij dhe se ai kishte kontakte me shumë persona me ndikim për të kryer detyrat e tij si diplomat.
Lajçak mbron pastërtinë e ndërgjegjes së tij, duke shpjeguar se çdo vendim është marrë në bazë të informacionit të disponueshëm në atë kohë. Megjithatë, kreu i Partisë Popullore Sllovake, Andrej Danko, ka kërkuar që Lajçak të japë shpjegime publike për natyrën e komunikimeve me Epsteinin, veçanërisht pas publikimit të dokumenteve nga Shtetet e Bashkuara.
Më 12 nëntor, Komiteti për Mbikëqyrjen e Dhomës së Përfaqësuesve të Kongresit të SHBA-së publikoi mijëra faqe dokumentesh lidhur me Epstein, përfshirë komunikime me email mes Lajçakut dhe financierit. Në këto dokumente, rezulton se Epstein kishte dërguar Lajçakut një link për një artikull në portalin Daily Beast që fliste për një potencial kolaps të presidentit të SHBA-së, Donald Trump.
Lajçak iu përgjigj Epstein-it me një email nga adresa zyrtare e ministrisë, duke shpjeguar se gjatë ditës kishte dëgjuar “mjaft dëshmi” për këtë temë. Epstein në komunikimet e tij i drejtohej Lajçakut me emrin “Miro” dhe sugjeroi mundësinë e udhëheqjes së ndonjë “projekti evropian”. Ai gjithashtu parashikoi se qeveria sllovake do të binte së shpejti, “sipas planit”. Një javë pas dërgimit të këtij email-i, qeveria e Robert Fico-s vërtet ra.
Ky skandal i komunikimeve me Epstein ka ngritur shqetësime dhe ka bërë thirrje për më shumë transparencë nga ana e Lajçakut, duke theksuar nevojën për të sqaruar detajet e këtyre kontakteve, në një kohë kur informacionet e reja dalin në pah.
