Finalizohet operacioni policor i koduar “Rented” në qytetin e Elbasanit, pas disa javësh hetimesh me metoda proaktive. Si rezultat, janë arrestuar në flagrancë dy shtetase nga Kazakistani, Z. M. (37 vjeçe) dhe N. S. (38 vjeçe), të cilat ishin angazhuar në prostitucion në dy apartamente të marra me qira.
Hetimi, i realizuar nga Seksioni për Hetimin e Trafiqeve i DVP Elbasan në bashkëpunim me Seksionin për Mbështetje Operacionale, zbuloi se shtetases M. C. (39 vjeçe) iu kaluan materiale penale për “Mbajtja e ambienteve për prostitucion” si pronare e apartamenteve. Gjatë kontrolleve, në këto ambiente u sekuestruan shuma parash në valuta të ndryshme, që dyshohen se janë të siguruara nga veprimtaria e paligjshme, si dhe celularë dhe dokumente identifikimi.
Prokuroria ka nisur procedimin penal për pronaren e apartamenteve, ndërsa vijon puna për kompletimin e hetimeve dhe identifikimin e personave të tjerë të përfshirë në këtë aktivitete. Materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm në Elbasan për veprime të mëtejshme.
