Ka filluar në Gjykatën e Tretë të Krimeve të Rënda në Romë gjyqi ndaj Mark Samson, i akuzuar për vrasjen e ish-të dashurës së tij, Ilaria Sula, një studente shqiptare që u vra në mars të këtij viti. Trupi i saj u gjet në valixhe në një zonë pyjore përreth Romës, pas një krimi që tronditi opinionin publik.
Prokurorët romakë, nën drejtimin e zëvendësprokurorit Giuseppe Cascini, kanë ngritur akuza të rënda ndaj Samson, duke e akuzuar për vrasje me paramendim, motiv të kotë, si dhe për fshehje të kufomës. Gjyqi u miratua përmes një procesi të menjëhershëm pas mbledhjes së provave gjatë hetimeve.
Gjyqi ka tërhequr vëmendjen e madhe, duke përfshirë praninë e familjarëve dhe miqve të Ilaria Sula-s në sallën e gjyqit. Aty ata mbanin një foto të saj dhe një banderolë me tekstin “Drejtësi për Ilarinë”.
Sipas informacionit nga LaPresse, avokati i familjes së viktimës, Giuseppe Sforza, ka bërë të ditur se nënë Mark Samson po përgatitet për të pranuar një marrëveshje, e cila do t’i garantonte asaj dy vjet burg për akuzat e bashkëpunimit në fshehjen e trupit dhe pastrimin e gjakut nga vendi ku ndodhi krimi. Kjo situatë e vështirë për familjen e Ilaria Sula është shoqëruar me tension dhe trishtim.
“Familja e Ilarias po e përjeton këtë moment me shumë tension dhe trishtim,” tha avokati Sforza. Ai theksoi se kërkesa për drejtësi është e fortë, por gjithashtu theksoi se asnjë vendim në gjykatë nuk do të mund të lehtësojë dhimbjen që do t’i shoqërojë ata përgjithmonë.
Rasti vazhdon të ndjekë një rrugë të gjatë ligjore, ndërsa e ardhmja për të akuzuarin dhe familjen e viktimës mbetet e pasigurt.
