Emisioni “Fiks Fare” ka denoncuar çiftin Elton dhe Alejda Dumani për mashtrimin e disa individëve me premtimin e vizave dhe kontratave pune në vende europiane, si edhe për punësimin e tyre pa pagë në mobilerinë “Luna” në Farkë, Tiranë. Dy denoncues, që punuan në këtë kompani, shpjeguan se, pas kërkimeve për punë në rrjete sociale, u takuan personalisht me çiftin, por nuk morën asnjë pagesë për punën e bërë nga prilli deri në korrik të vitit 2025.
Një denoncues nga Egjipti deklaroi se Eltoni e mashtroi duke premtuar një pagë prej 1000 eurosh mujor, ndërsa ai punonte shumë më tepër se orari i parashikuar. Ai bëri të ditur se madje ishin kërcënuar nga Alejda, e cila shpjegoi se kishte lidhje me persona të njohur, duke lënë të kuptohet se mund të kishin pasoja për denoncimin.
Më parë, “Fiks Fare” kishte raportuar për një tjetër rast mashtrimi nga ana e Elton Dumanit, i cili merrte para për viza pune dhe kërcënonte ata që kërkonin kthimin e parave. Denoncuesit, rreth 15 në total, kanë kërkuar ndihmën e Inspektoriatitt të Punës dhe Policisë, por deri më tani nuk kanë marrë asnjë reagim.
Një prej denoncuesve tregoi se ishin të detyruar të jetonin në kushte të vështira, ndërsa Eltoni u premtoi se do t’u sigurojë strehim, por përfunduan në hotele pa pagesë. Pas kërkesave për pagesë, ai iu dha 400 euro, një shumë që nuk mbulonte nevojat e tyre.
Përgjigjet nga institucione të ndryshme kanë qenë të paqarta. Autoritetet shpjeguan se çështja ishte në proces hetimi, por denoncuesit ndihen të kërcënuar dhe të pasigurt. Elton Dumani, në përgjigje të pyetjeve, tha se problemet e likuidimit ishin të natyrshme dhe se duhej të flisnim me Alejdën.
Pas kontakteve me Alejda, ajo e përjashtoi akuzat, duke pohuar se ishin kallëzime të rreme dhe sugjeroi që çështja do të trajtohej nga autoritetet. Ajo refuzoi të jepte një intervistë, ndërsa situata mbetet e paqartë për të gjithë ata që pretendojnë se kanë qenë të punësuar dhe kërkojnë pagat e tyre.
