TIRANA– Policia ka larguar me karotrec automjetin luksoz me të cilin udhëtonin Gilmando Dani (krahu i djathë i Emiljano Shullazit) dhe Muçi Shaljani (i njohur me nofkën “Sheqeri”) pas afro pesë orësh nga atentati i ndodhur pranë Aeroportit të Rinasit. Në këtë ngjarje mafioze, 47-vjeçari Dani mbeti i vrarë, ndërsa Shaljani u plagos rëndë dhe ndodhet në gjendje kritike në Spitalin e Traumës në Tiranë.
Sipas njoftimit zyrtar të policisë, atentati ka ndodhur rreth orës 14:20 të ditës së sotme, në rrethrrotullimin afër aeroportit.
Makina e shkrumbuar
Makina që shihni në foton e mësipërme është automjeti tip Toyota Yaris, që dyshohet se u përdor nga autorët e atentatit në afërsi të Rinasit, ku u ekzekutua Gilmando Dani dhe u plagos rëndë Muçi Shaljani. Siç shihet edhe në pamje, automjeti është gjetur plotësisht i shkrumbuar në një zonë të pyllëzuar në fshatin Halil të Krujës, aty ku autorët dyshohet se e kanë djegur për të zhdukur gjurmët.
Policia, nëpërmjet një njoftimi zyrtar, ka bërë me dije se gjatë kontrollit në mjet janë gjetur katër armë zjarri, të cilat janë sekuestruar si prova materiale. Grupi hetimor po kryen ekspertizat për të përcaktuar nëse armët e gjetura janë përdorur në atentatin ndaj Danit dhe Shaljanit, ndërsa vijon puna për identifikimin dhe kapjen e autorëve të dyshuar.
