Parlamenti i Izraelit ka miratuar me lexim të parë një projektligj që parashikon dënimin me vdekje për terroristët që vrasin qytetarë izraelitë. Ky është vetëm hapi i parë në një proces që kërkon tre votime për miratimin përfundimtar të ligjit.
Ministri i Sigurisë Kombëtare, Itamar Ben-Gvir, një figurë e rëndësishme e ekstremit të djathtë, e cila ka kërcënuar më parë të tërheqë mbështetje nga qeveria e kryeministrit Benjamin Netanyahu nëse ligji nuk shqyrtohej, e vlerësoi këtë hap si historik. Ai theksoi përkushtimin e tij për të luftuar terroristët.
Sipas projektligjit, kushdo që shkakton vdekjen e një qytetari izraelit për arsye racizmi ose urrejtjeje dhe me qëllim të dëmtonte shtetin e Izraelit do të ndeshet me dënimin me vdekje. Ky formulim ka shkaktuar diskutime, duke sugjeruar se dënimi do të përfshijë çdo palestinez që vret një izraelit, përkundrazi duke lënë hapsirë që një izraelit të mos dënohet në rastin e vrasjes së një palestinezi.
Komiteti i Sigurisë Kombëtare e mbrojti ligjin duke theksuar se qëllimi i tij është “të shkatërrojë terrorizmin në rrënjë dhe të krijojë një pengesë të fortë”. Ben-Gvir shtoi se çdo terrorist duhet të ditë se do të ndëshkohet me vdekje për veprat e tij.
Miratimi i këtij ligji ndodh në një moment delikat, pasi marrëveshja e armëpushimit mes Izraelit dhe Hamasit, e arritur më 10 tetor nën presionin e SHBA-së, vazhdon të jetë e brishtë. Kjo situatë e ndërlikuar ndikon në klimën politike dhe shoqërore, duke i dhënë një rëndësi shtesë vendimit të Knesetit.
