Presidenti amerikan Donald Trump organizoi të hënën një takim me presidentin sirian Ahmad al-Sharaa në Shtëpinë e Bardhë, duke shënuar kështu një rikthim të jashtëzakonshëm të diplomacisë amerikane me Sirinë, një vend që ishte përjashtuar nga skena ndërkombëtare. Ky takim është pjesë e një koalicioni global të udhëhequr nga SHBA për të luftuar grupin Shteti Islamik (ISIS).
Al-Sharaa mbërriti në mëngjes, duke zhvilluar bisedime në Zyrën Ovale me Trump. Ai hyri përmes West Executive Avenue, një hyrje të papërdorur shpesh për vizita të nivelit të lartë, dhe pas një takimi rreth dy orësh, u largua duke përshëndetur mbështetësit e pranishëm jashtë ndërtesës.
Ky është takimi i parë i një presidenti sirian me një president amerikan që nga pavarësia e Sirisë në vitin 1946. Takimi vjen pas heqjes së sanksioneve ndaj Damaskut dhe përfundimit të dekadave nën regjimin e familjes Assad. Al-Sharaa, i cili udhëhoqi forcat rebele në rrëzimin e Bashar al-Assad-it, u emërua president i përkohshëm i Sirisë në janar. Ai ka një të kaluar kontroversale, pasi ka qenë i lidhur me grupin al-Kaida dhe SHBA kishte shpallur një shpërblim prej 10 milionë dollarësh për informacion lidhur me të.
Trump dhe al-Sharaa kishin zhvilluar një takim të parë në maj, gjatë një samiti në Arabinë Saudite, ku presidenti amerikan e përshkruajti al-Sharaan si “një djalë të ri dhe të fortë, me një të kaluar të ashpër, por luftëtar të vendosur.”
Ky takim shënon gjithashtu momentin e parë të një ndërveprimi zyrtar midis SHBA-së dhe Sirisë që nga viti 2000, kur Bill Clinton pati një takim historik me Hafez al-Assad, babain e Bashar Assadit.
Kjo vizitë nënvizon një ndryshim të madh në politikën ndërkombëtare, duke hapur mundësi për një ribashkim të diplomacisë me një vend që ka qenë në qendër të tensioneve globale për dekada me radhë.
