Parlamenti danez ka propozuar vendosjen e një moshe minimale prej 15 vjeç për përdorimin e mediave sociale, duke u pajtuar me partitë e tjera për këtë ligj. Sipas planit, prindërit do të kenë mundësinë t’u lejojnë fëmijëve të tyre të regjistrohen në këto platforma në moshën 13 vjeçare. Qëllimi kryesor i legjislacionit është mbrojtja e fëmijëve dhe të rinjve në ambientin digjital, duke u ofruar më shumë kohë për aktivitetet e jashtme dhe zhvillimin personal, përpara se të krijojnë profile në rrjete sociale që përmbajnë rreziqe.
Megjithatë, shumë detaje rreth zbatimit të këtij ligji mbeten të paqarta. Për shembull, nuk janë specifikuar platforma të caktuara që do të preken nga ky ligj, e as se kur do të hyjë në fuqi. Marrëveshja përmend vetëm kufizime për platformat më të mëdha ku përdoruesit mund të krijojnë profile publike dhe që i ekspozojnë fëmijët dhe të rinjtë ndaj rreziqeve të ndryshme. Një deklaratë e Ministrisë daneze të Çështjeve Digjitale ka theksuar se fëmijët janë nën presionin e marrëdhënieve digjitale, të cilat ndikojnë në cilësinë e gjumit dhe aftësinë për t’u përqendruar.
Danimarka synon të jetë një nga shtetet e para anëtare të Bashkimit Evropian që ndërmerr hapa të tillë për të kufizuar përdorimin e mediave sociale. Kryetari aktual i Këshillit të BE-së ka njoftuar se do të promovojë këtë çështje në nivel evropian. Si referencë për këto kufizime, Australia ka vendosur që të rinjtë mund të përdorin platforma si TikTok, Snapchat, YouTube, Facebook dhe Instagram vetëm nga mosha 16 vjeçare e lart.
Me këtë nismë, Danimarka kërkon të nxisë një diskutim më të gjerë rreth përdorimit të mediave sociale dhe ndikimit të tyre në fëmijët dhe të rinjtë, ndërsa mbetet për tu parë se si do të implementohet konkretisht ky ligj dhe cilat implikime do të ketë në jetën digjitale të qytetarëve të saj.
