Pesë bashki në vend po zgjedhin sot kryebashkiakët e rinj, me një total prej 334,539 votuesish që pritet të votojnë në Vlorë, Berat, Cërrik, Mat dhe Tepelenë. Qendrat e votimit kanë hapur dyert sipas orarit zyrtar dhe do të mbyllen në orën 18:00, siç përcaktohet nga kodi zgjedhor.
Komisioni Qendror i Zgjedhjeve ka shpërndarë materialet zgjedhore, ndërsa kutitë e votimit janë vendosur në KZAZ-të e çdo bashkie. Në Vlorë, 171,895 qytetarë do të votojnë në 232 qendra, ndërsa në Tepelenë votojnë 12,667 qytetarë në 22 qendra. Mat ka 29,092 votues në 47 qendra, Cërrik 38,724 në 57 qendra, dhe në Berat 82,161 votues në 116 qendra.
Në garën për të zëvendësuar 5 kryebashkiakë të zgjedhur si deputetë ose ministra, siç është rasti i Andis Sallës nga Cërriku, janë regjistruar 13 kandidat. Fushata për këto zgjedhje të pjesshme ka qenë e qetë, pa mitingje apo takime elektorale me liderët e partive kryesore. Ndryshe nga herët e tjera, Partia Demokratike nuk ka paraqitur kandidatë nën siglën e saj, por e ka mbështetur disa kandidat të pavarur.
Sipas raportimeve nga KQZ-ja, deri në orën 08:00 pjesëmarrja në votim ishte e ulët: në Vlorë 687 qytetarë (0.51%), Berat 580 (0.83%), Cërrik 323 (0.97%), Mat 463 (1.96%) dhe Tepelenë 182 (2.07%). Edhe kandidatë të partive si “Shqipëria Bëhet” dhe “Partia Socialiste” kanë bërë thirrje për pjesëmarrje masive.
Masa të shtuara sigurie janë vendosur për të mbajtur në kontroll 473 qendra votimi, me policinë që do të monitorojë procesin. Ka pasur disa probleme, si në Vlorë, ku katër qendra votimi nuk kishin nisur procesin dhe në Berat ku u raportuan probleme me kamerat në një qendër votimi. Kryeministri Edi Rama u ka bërë thirrje qytetarëve që të ushtrojnë të drejtën e votes.
