Parlamenti i Serbisë miratoi një ligj të ri që heq statusin e mbrojtur kulturor nga një monument, i bombarduar nga NATO në vitin 1999, duke i hapur rrugën ndërtimit të një hoteli luksoz dhe rezidencash nën markën “Trump”. Sipas projektit të raportuar nga New York Times, hoteli do të ndërtohet në ish-kompleksin ushtarak të Shtabit të Përgjithshëm të Ushtrisë Serbe në Beograd, një ndërtesë simbolike për luftën dhe rezistencën e vendit. Investimet për projektin pritet të kapin vlerën mbi 500 milionë dollarë dhe përfshijnë 175 dhoma hoteli, hapësira tregtare dhe mbi 1,500 apartamente.
Ndërsa planet e ndërtimit, të propozuara që në vitin 2013, përballeshin me pengesa për shkak të akuzave për mashtrim, ligjvënësit e partisë qeverisëse njoftuan përdorimin e një dispozite kushtetuese për të rifilluar procesin legjislativ. Debati parlamentar është shoqëruar me protesta të studentëve, prokurorëve dhe aktivistëve të të drejtave të njeriut, që e kanë quajtur këtë vendim një “provokim të rrezikshëm” në një kontekst të tensionuar brenda vendit.
Milenko Jovanov, që paraqiti ligjin, pretendoi se masa synon rigjallërimin e ndërtesave të braktisura dhe potencialisht përmirësimin e marrëdhënieve me Shtetet e Bashkuara. Ai shprehu optimizëm se projekti do të krijojë mundësi të reja për ekonominë e vendit. Përkundrazi, deputetja opozitare Marinika Tepić e kritikoi vendimin, duke e cilësuar ndërtesën si një “simbol të rezistencës kombëtare” dhe e akuzoi qeverinë për shndërrimin e saj në një kompleks luksoz për t’i pëlqyer ish-Presidentit Trump.
Komisioni Europian shprehu shqetësim në lidhje me “gërryerjen e sundimit të ligjit” në Serbi, duke paralajmëruar se veprime të tilla mund të ndikojnë negativisht në procesin e anëtarësimit të vendit në BE. Shtabi i Përgjithshëm, i ndërtuar në vitet 1960, konsiderohet një kryevepër e modernizmit dhe u dëmtua rëndë nga bombardimet e NATO-s gjatë krizës në Kosovë. Pas rizgjedhjes së Trump, Serbia e shpalli kompleksin jo më si një aset të mbrojtur kulturor.
Deri tani, protesta ndaj qeverisë Vuçiç vazhdojnë, përfshirë edhe një grevë urie nga një nënë që humbi vajzën e saj në një shembje ndërtese vitin e kaluar, duke nxitur më tej zemërimin e publikut ndaj autoriteteve.
