Që nga viti 2020, Kina ka ndërmarrë një zgjerim të rëndësishëm të fabrikave dhe qendrave të prodhimit të raketave, duke forcuar kapacitetet e saj ushtarake dhe ambiciet për t’u pozicionuar si superfuqi globale. Një analizë e CNN, e mbështetur në imazhe satelitore dhe njoftime qeveritare, tregon se mbi 60% e 136 objekteve të forcës raketore kineze kanë shfaqur shenja zgjerimi, duke përfshirë fabrika dhe qendra kërkimore, me një rritje prej mbi 2 milionë metra katrorë hapësirë ndërtimi në pesë vitet e fundit.
Ekspertët e sigurisë theksojnë se ky zgjerim lidhet me strategjinë e Kinës për zhvillimin e raketave më të avancuara, si mënyrë për të parandaluar ndërhyrjen ushtarake të SHBA-së në rajon. Raketat e reja do të jenë një pjesë e rëndësishme e presionit mbi Tajvanin dhe integrimit të një zone pranë bregut kinez, që mund të kufizojë ndihmën amerikane në rast konflikti.
Që nga ardhja e Xi Jinping në pushtet në 2012, Kina ka investuar masa të mëdha financiare për modernizimin e forcave të saj ushtarake dhe ndërtimin e Forcës Raketore të PLA-së, e cila menaxhon arsenalin bërthamor dhe raketat balistike. Sipas të dhënave të SIPRI, Kina po rrit arsenalin e saj bërthamor me rreth 100 kokëbërthama të reja në vit që nga 2023, duke u bërë një nga vendet me rritjen më të shpejtë në këtë fushë, megjithëse ende mbetet pas SHBA-së dhe Rusisë në aspektin e arsenaleve globale.
Zgjerimi i prodhimit të raketave është përshpejtuar pas pushtimit të Ukrainës nga Rusia në vitin 2022, me Kinën që përpiqet të përfitojë nga mësimet e marra nga përdorimi i teknologjive moderne në luftë. CNN ka identifikuar 99 objekte të lidhura me prodhimin e raketave, ku 65 prej tyre kanë qenë në proces zgjerimi ndjeshëm.
Ndërkohë, SHBA po përballet me sfida në furnizimin e sistemeve të mbrojtjes, si THAAD, të cilat janë të shtrenjta dhe kërkojnë kohë për të prodhuar. Ky kombinim, me rritjen e kapaciteve kineze dhe vështirësitë amerikane, mund të rrisë tensionet në Azi-Paqësor dhe në skenën globale. Ekspertët e kontrolleve të armëve shprehin shqetësime se kjo situatë mund të kërcënojë stabilitetin dhe të përshpejtojë garën globale të armatimeve.
