Mbi 700 oficerë policie u angazhuan në një operacion të gjerë sigurie rreth stadiumit Villa Park në Birmingham, në kuadër të ndeshjes mes Aston Villa dhe Maccabi Tel Aviv. Gjatë protestave për këtë ngjarje, 11 persona u arrestuan për hedhje fishekzjarrësh, posedim lëndësh narkotike dhe sharje me përmbajtje raciste.
Ndeshja u zhvillua pa tifozët izraelitë, pasi Policia e West Midlands e konsideroi atë si një ngjarje me rrezik të lartë. Persona me maska vendosën pankarta si “Zionists not welcome”, ndërsa grupe pro-palestinezë organizuan demonstrata që shpërthyen para dhe gjatë ndeshjes.
Frika nga përplasjet shkaktoi mbylljen e disa shkollave në zonë, si dhe vendosjen e një zone pa fluturime mbi stadium, që ka kapacitet 40 mijë vendesh. Një avion policie patrullonte në ajër, ndërsa autoritetet zbatuan nenin 60, duke lejuar ndalimin dhe kontrollin e personave pa një arsye specifike.
Përpara stadiumit, qindra protestues pro-palestinezë valëvitën flamuj dhe mbajtën fjalime, ndërsa policia anti-revoltë qëndroi pranë hyrjeve. Një grua u ndalua pasi valëviti një flamur izraelit përballë turmës. Në të njëjtën kohë, rreth 100 mbështetës pro-izraelitë zhvilluan një kundërprotestë, ndihmuar nga policia deri në hyrjen për tifozët miq.
Përpara ndeshjes, pesë kamionë me ekrane elektronikë kaluan me mesazhe kundër antisemitizmit. Ekipi i Maccabi arriti në stadium katër orë përpara ndeshjes, nën masa të rrepta sigurie. Vendimi për mbajtjen e ndeshjes erdhi pas një armëpushimi të përkohshëm, që lejoi pjesëmarrjen e Maccabi në Europa League, përkundër thirrjeve për përjashtimin e ekipeve izraelite nga garat ndërkombëtare.
Policia e Birminghamit njoftoi se operacioni kishte për qëllim parandalimin e përplasjeve dhe sigurimin e rendit publik, në një atmosferë të mbushur me tensione politike dhe emocionale lidhur me ndeshjen.
