Policia e Tiranës ka zbardhur ngjarjen që ndodhi në Bathore, ku një 24-vjeçar mbeti i plagosur me armë zjarri. Pas hetimeve intensive, autoritetet identifikuan, kapën dhe arrestuan të dyshuarin, D. B., gjithashtu 24 vjeç.
Ngjarja ndodhi në rrugën “Ali Këlçyra”, ku D. B. dyshohet se ka qëlluar E. V., i njëjtë në moshë, gjatë një konflikti për motive të dobëta, duke e plagosur në krah. I plagosuri aktualisht ndodhet në spital, jashtë rrezikut për jetën. Policia vazhdon kërkimet për gjetjen e armës së krimit.
Autori i dyshuar përballet me akuza për “Vrasje me dashje” të mbetur në tentativë dhe “Mbajtje pa leje e armëve dhe municionit”. Materialet hetimore janë referuar Prokurorisë së Tiranës për procedura të mëtejshme.
