Ish presidenti i Federatës Spanjolle të Futbollit, Luis Rubiales, ka njoftuar rikthimin e tij në rrjetet sociale pas një periudhe gati dy vjeçare mungese. Ai ka hapur dy llogari të reja dhe nëpërmjet tyre planifikon të ndajë projektet e tij të reja, të angazhohet në debate, dhe të dëgjojë opinionet e ndjekësve. “Synimi im është të kontribuoj herë pas here me mendime për tema të rëndësishme, të sqaroj çështje që më prekin dhe të hedh poshtë dezinformatat,” ka deklaruar Rubiales, duke theksuar se do të angazhohet me respekt dhe në një mënyrë konstruktive.
Ky rikthim vjen në prag të publikimit të librit të tij “Të vrasësh Rubiales”, i cili pritet të publikohet gjatë këtij muaji. Libri, me më shumë se 500 faqe, përfshin dokumentacione dhe përshkruan versionin e tij në lidhje me ngjarjen e puthjes ndaj lojtares Jenni Hermoso, për të cilën u dënuar me 10,800 euro dhe u ndalua t’i afrohej asaj në një distancë më pak se 200 metra.
Pas skandalit të puthjes jokonsensuale, Rubiales u detyrua të largohej nga posti i presidentit të federatës dhe i qëndroi larg jetës publike dhe komunikimeve digjitale. Tani, me publikimin e librit në horizont, ai ka vendosur të thyejë heshtjen dhe të rikthehet në skenën publike.
Rikthimi i tij në rrjetet sociale dhe publikimi i librit tregojnë se Rubiales është i gatshëm të definojë narrativën e tij dhe të reagojë ndaj sfidave që ka hasur gjatë karrierës së tij, sidomos në lidhje me incidentet që e detyruan të largohej nga posti. Kjo do të jetë një mundësi për të shpjeguar vendimet dhe veprimet e tij në një kohë kur skandali kishte sjellë pasoja të rëndësishme për reputacionin e tij dhe për federatën.
