Presidentja meksikane, Claudia Sheinbaum, ka qenë objekt i një sulmi seksual gjatë një komunikimi me qytetarët në rrugë. Ngjarja, e cila u regjistrua në video dhe u publikua nga Daily Mail, ka shkaktuar një valë zemërimi në rrjetet sociale. Në pamjet, sulmuesi, duke u dukur i dehur, afrohet dhe tenton ta puthë në qafë presidenten, ndërsa ajo flet me mbështetësit në një rrugë historike të Mexico City.
Pavarësisht situatës, Sheinbaum ka reaguar me qetësi, duke i thënë burrit se do të bëjnë një foto, dhe vetëm më vonë një anëtar i ekipit të saj të sigurisë intervenoi. Ky incident ka shkaktuar kritika të ashpra për reagimin e ngadaltë të truprojave të saj. Shumë përdorues në rrjetet sociale janë shqetësuar për sigurinë e presidentes, duke pyetur për rolin e sigurisë presidenciale në një situatë të tillë.
Një përdorues i platformës X (ish-Twitter) shkroi: “Ku ishte sigurimi i presidentes gjatë sulmit?” Ndërsa një tjetër komentoi se nëse Meksika nuk është në gjendje të mbrojë presidenten, atëherë si mund të mbrojë qytetarët e zakonshëm. Reagimet ndaj truprojave u quajtën “të pabesueshme” nga ndjekësit e ngjarjes.
Sipas mediave lokale, sulmuesi u arrestua menjëherë pas incidentit. Megjithatë, zyra e Presidentes nuk ka lëshuar ende një deklaratë zyrtare në lidhje me ngjarjen. Sekretariati për Gratë dhe organizatat lidhur me barazinë gjinore e kanë dënuar ashpër incidentin, duke theksuar se ngacmimet seksuale janë një problem i përhapur në Meksikë. Ata e konsiderojnë këtë incident si një shenjë të kulturës së “mashkullorisë” që vazhdon të mbizotërojë në vend, një çështje që është bërë gjithnjë e më shqetësuese për aktivistët që luftojnë për mbrojtjen e grave. Meksika përballet me nivele të larta dhune ndaj grave, duke përfshirë ngacmime dhe forma më ekstreme si sulmet me acid dhe femicidet.
