Të paktën dy ortekë në Nepal kanë shkaktuar tragjedinë e nëntë viktimave, përfshirë alpinistë nga Italia, Gjermania dhe Franca. Dy alpinistët italianë, Stefano Farronato dhe Alessandro Caputo, ishin në përpjekje për të arritur majën Panbari Himal, kur janë goditur nga orteku. Valter Perlino, njëri prej shokëve të tyre, arriti të mbijetojë dhe njoftoi për ngjarjen.
Një grup tjetër italianësh u godit nga një ortek në Yalung Ri, ku humbën jetën tre alpinistë të tjerë: Paolo Cocco, Marco Di Marcello dhe Markus Kirchler. Cocco, një fotograf dhe ish-zëvendëskryetar i bashkisë Fara San Martino, ishte duke u ngjitur në majën Dolma Khang kur gjeti vdekjen. Vdekja e tij u konfirmua nga kryebashkiaku. Di Marcello dhe Kirchler gjithashtu u regjistruan si viktima të fatkeqësisë. Përveç tyre, humbën jetën Jakob Schreiber nga Gjermania, Christian Andre Manfredi nga Franca, si dhe dy udhërrëfyes nepalezë.
Nga ngjarja, vetëm pesë persona – tre nepalezë dhe dy francezë – arritën të mbijetonin dhe u transportuan me helikopter në Katmandu. Pas këtyre tragjedive, janë ngritur shqetësime dhe kritika mbi menaxhimin e emergjencave në Nepal. Një Sherpa, i cili mbijetoi nga një nga ortekët, deklaroi se priste më shumë se 24 orë për t’u evakuuar në spital.
Sipas gazetës Himalayan Times, vonesat në shpëtim lidhen me procedurat burokratike të nevojshme për të marrë leje për fluturime shpëtimi, që përfshijnë disa institucione, si Ministritë e Turizmit, Brendshme dhe Mbrojtjes. Pasang Kidar, udhërrëfyes dhe nënkryetar i Klubit të Ngjitësve të Malit Rolwaling-Everest, sqaron se orteku ra në mëngjes, por autorizimi për shpëtim u dha me vonesë, rreth tetë orë më vonë.
Phur Gyalje, presidenti i Shoqatës së Alpinizmit të Nepalit, theksoi nevojën për reforma urgjente në sistemin e reagimit ndaj emergjencave, duke theksuar rëndësinë e procedurave të shpejta të shpëtimit për të ruajtur jetë në male.
