Trajneri i Kombëtares shqiptare, Sylvinho, vizitoi Elite Youth Academy, ku u takua me lojtarët dhe ndau eksperiencat e tij si futbollist dhe trajner. Ai filloi rrëfimin me momentet nisëse të karrierës, duke i dhënë rëndësi aventurës së tij në stolin e kombëtares.
Gjatë takimit, Sylvinho theksoi rëndësinë e përballjes me sfidat si futbollist. Ai shprehu frustrimin që ndjen kur nuk luan mirë ose nuk luan fare. “Pjesa më e vështirë për mua ishte menaxhimi i këtyre momenteve. Është e rëndësishme të mos e transferosh këtë frustrim te shokët e skuadrës,” tha ai, duke e ilustruar me përvojat e tij që nga mosha 15-16 vjeçare, kur u përball për herë të parë me uljen në bankë.
Ish-trajneri i tij, ai tha se duhet të besojnë te vetvetja. “Nëse duhet të qani, qani. Bëni më të mirën tuaj,” inkurajoi ai lojtarët e rinj. Ai theksoi se performanca e mirë në ndeshje vjen si rezultat i stërvitjes së vazhdueshme dhe përgatitjes. “Ti luan mirë të dielën, sepse je stërvitur 100 ditë njësoj,” shtoi ai, duke theksuar se përgatitja është vendimtare.
Sylvinho qëndroi i fokusuar në unitetin e skuadrës, duke inkurajuar lojtarët të qëndrojnë afër njëri-tjetrit. Ai theksoi se në fushë, lojtarët duhet të mbështesin njëri-tjetrin. “Njëri vrapon për tjetrin me më shumë kënaqësi. Këtë kërkojmë nga ekipi,” përfundoi ai.
Në një kohë kur futbolli shqiptar po përballet me sfida të shumta, mesazhi i Sylvinhos për besim, përgatitje dhe unitet është një thirrje për lojtarët e rinj që synojnë të arrijnë majat e karrierës së tyre.
