Norvegjia, përmes fondit të saj sovran të pasurisë, ka njoftuar se do të votojë kundër një paketë rekord kompensimi për Elon Musk, që mund t’i sjellë atij deri në 1 trilion dollarë në aksione. Të premten, aksionarët e Teslës do të vendosin për këtë plan, i cili është konsideruar si pagesa më e madhe ndonjëherë për një drejtues ekzekutiv, duke shkaktuar debate të forta në botën financiare dhe teknologjike.
Fondi norvegjez zotëron rreth 1.12% të aksioneve të Teslës, me një vlerë prej rreth 17 miliardë dollarësh, dhe kështu është investitori më i madh institucional jo-amerikan që shpreh një pozicion të tillë. Ndërkohë, Baron Capital, investitori i dytë më i madh institucional, ka shprehur mbështetje për paketën, ndërsa kompanitë e mëdha financiare si BlackRock, Vanguard dhe State Street ende nuk kanë bërë publike qëndrimet e tyre.
Bordi i Teslës, megjithatë, mbetet i angazhuar në mbështetje të Musk, me kryetaren Robin Denholm që ka paralajmëruar se një refuzim i planit mund të çonte në largimin e tij nga kompania. Nga ana tjetër, fondi norvegjez ka shprehur shqetësim për “madhësinë e jashtëzakonshme të kompensimit, hollimin e aksioneve dhe mungesën e mekanizmave për të kufizuar rrezikun nga varësia në një person të vetëm”.
Ky institucion kishte votuar edhe kundër një pakete të mëparshme prej 56 miliardë dollarësh, e cila kishte provokuar një reagim të ashpër nga Musk. Analiza e paketes aktuale, pas llogaritjes së kostos së lëshimit të aksioneve, e çon vlerën e saj në rreth 878 miliardë dollarë. Tesla ka deklaruar se Musk nuk do të marrë asgjë nëse kompaninë nuk e rrit ndjeshëm vlerën e saj dhe shpërblimi maksimal do të aktivizohet vetëm nëse kapitalizimi i tregut arrin 8.5 trilion dollarë. Megjithatë, ekspertët kanë paralajmëruar se Musk mund të përfitojë dhjetëra miliardë dollarë edhe pa arritjen e objektivave të plota.
Votimi i 6 nëntorit pritet me shumë interes, ndërsa tensionet mbi paketën e kompenzimit po trondisin marrëdhëniet midis investitorëve dhe Musk.
