Policia e Vlorës, së bashku me Forcat Operacionale dhe FNSH-në, ka intensifikuar kontrollet në qytet pas ngjarjeve të fundit, për të rritur sigurinë publike. Pikat e kontrollit janë vendosur në disa zona kryesore, ku përqendrohen te drejtuesit e mjeteve luksoze dhe individët me precedentë penalë, si dhe ata që dyshohen se qarkullojnë me armë të ftohta ose nën efektin e alkoolit.
Kontrollet përfshijnë gjithashtu verifikimin e dokumentacionit dhe respektimin e rregullave të qarkullimit rrugor. Sipas burimeve nga policia, këto masa do të vazhdojnë edhe në ditët në vijim në të gjitha akset kryesore të qytetit, me qëllim parandalimin e ngjarjeve kriminale dhe garantimin e rendit e qetësisë publike në Vlorë.
