Pesë ditë pas goditjes së uraganit “Melissa” në perëndim të Xhamajkës, situata në komunitetet bregdetare mbetet dramatike. Mungesa e ushqimeve, energjisë elektrike dhe ujit të pijshëm ka çuar në izolimin e shumicës së banorëve, ndërsa ndihmat po arrijnë me shumë vështirësi. Numri i viktimave ka arritur në 28, duke shënuar një rritje gati 50% brenda natës, dhe ky bilanc pritet të rritet, teksa ekipet e emergjencës përpiqen të arrijnë në zonat e paarritshme.
Uragani, i klasifikuar si stuhia më e fuqishme që ka goditur ishullin në historinë moderne, ka shkaktuar dëme të rënda, veçanërisht në parish-et Westmoreland dhe St. Elizabeth, ku deri në 90% e banesave janë shkatërruar. Pamja e Xhamajkës është e zymtë, me rrugë të bllokuara nga pemë të rrëzuara, godinat të shembura dhe njerëz në pritje për ndihmë.
Banorët e Whitehouse, një nga zonat më të goditura, shprehen të dëshpëruar për mungesën e ndihmës. “Na thanë që do vijnë me ushqime, por nuk shohim askënd,” thotë një banor që ka humbur shtëpinë. Rreth 400 mijë persona janë pa energji elektrike, dhe autoritetet kanë nisur vendosjen e pajisjeve emergjente për komunikim satelitor, për të përmirësuar situatën.
Kryeministri Andrew Holness ka theksuar se prioritetet janë rikthimi i shërbimeve bazë, si ushqimi dhe ndihma mjekësore, duke pranuar se terreni i vështirë ka ngadalësuar operacionet. Pavarësisht vështirësive, banorët e Xhamajkës shprehin se shpresa është e vetmja gjë që uragani nuk mund t’ua marrë.
Ndihmat ndërkombëtare po fillojnë të mbërrijnë, me SHBA-në, Britaninë dhe vende të tjera që kanë angazhuar fonde dhe ekipe emergjence për të mbështetur Xhamajkën në këtë krizë. Një peshkatar tha: “Uragani na mori gjithçka, por jemi gjallë. Do provojmë të ngrihemi sërish.” Situata mbetet një çështje mbijetese për shumë banorë.
