Tensionet mes Izraelit dhe Hezbollahut kanë arritur nivel të ri intensiteti, pas deklaratave të ministrit izraelit të Mbrojtjes, Israel Katz, i cili paralajmëroi për intensifikimin e sulmeve ndaj grupit të mbështetur nga Irani. Kjo ndodhi një ditë pas një sulmi ajror izraelit në jug të Libanit, që rezultoi me vdekjen e katër personave, sipas Ministrisë libaneze të Shëndetësisë.
Megjithëse është në fuqi një armëpushim që daton në nëntor 2024, Izraeli vazhdon të mbajë trupa në pesë zona të jugut të Libanit dhe realizon sulme ajrore të shpeshta. Katz e akuzoi qeverinë libaneze se po hesht në zbatimin e marrëveshjes për çarmatimin e Hezbollahut, duke deklaruar se “Hezbollahu po luan me zjarrin”.
Forcat e Mbrojtjes së Izraelit konfirmuan se sulmi ajror i ditës së djeshme në qytetin Kfar Reman kishte si objektiv forcën elitare Radwan të Hezbollahut, duke vrarë katër prej anëtarëve të saj, përfshirë shefin e logjistikës. Viktimat janë identifikuar si Jawad Jaber, Hadi Hamid, Abdullah Kahil dhe Muhammad Kahil.
Pavarësisht dëmeve të rënda të pësuara në luftën e kaluar, Hezbollah vazhdon të jetë i armatosur dhe financiarisht aktiv. Marrëveshja e armëpushimit e ndërmjetësuar nga SHBA parashikon që vetëm forcat shtetërore libaneze të mbajnë armë, duke çuar në nevojën e çarmatimit të Hezbollahut. Megjithatë, Bejruti nuk ka arritur të përmbushë këtë detyrim, përkundrazi, forcat libaneze thonë se kanë shkatërruar një numër të konsiderueshëm depot të armëve të Hezbollahut.
Ndërkohë, ushtria libaneze përpiqet të ruajë një ekuilibër të brishtë dhe respektin për armëpushimin, ndërsa përballen me presionin ndëkombëtar për të vepruar ndaj Hezbollahut. Incidentet e fundit, përfshirë një sulm tokësor të Izraelit në jug të Libanit, kanë rritur shqetësimet për një përshkallëzim të tensioneve rajonale.
Presidenti libanez, Joseph Aoun, urdhëroi ushtrinë që të reagojë ndaj çdo shkeljeje të sovranitetit territorial, duke shprehur shqetësimin për sigurinë e vendit. Situata në Liban mbetet delikate, dhe kufiri jugor, përshkak të tensioneve të vazhdueshme, është një vatër konfliktuale.
