Dy persona kanë humbur jetën në Nju Jork si pasojë e përmbytjeve të shkaktuara nga reshjet rekord të shiut që goditën qytetin të enjten, duke përmbytur rrugë, bodrume dhe stacione metroje. Policia e qytetit konfirmoi identitetin e viktimave si burra 39 dhe 43 vjeç.
Incidenti i parë ndodhi në Brooklyn, ku 39-vjeçari u gjet pa shenja jete në bodrumin e një ndërtese e cila kishte pësuar përmbytje. Ekipet e zhytjes së Shërbimit të Zjarrit të Nju Jorkut (FDNY) nxorën trupin, por mjekët deklaruan se ai kishte ndërruar jetë.
Rasti i dytë ndodhi në Washington Heights, në veri të Manhattanit, ku trupi i 43-vjeçarit u gjet gjithashtu brenda një ambienti të përmbytur. Sipas Departamentit të Menaxhimit të Emergjencave, reshjet e shiut kanë thyer rekorde historike për qytetin. Shërbimi Kombëtar i Motit raportoi se në Central Park janë rregjistruar 1.8 inç shi, një shifër që kalon rekordet e mëparshme të vitit 1917. Po ashtu, Aeroporti LaGuardia raportoi 1.97 inç reshje, duke thyer rekordet e vitit 1955.
Autoritetet i kanë bërë thirrje qytetarëve që të shmangin bodrumet dhe zonat e rrezikshme për përmbytje, për të ruajtur sigurinë e tyre. Gjithashtu, paralajmërimet vazhdojnë për reshje të tjera të mundshme, duke i bërë banorët të qëndrojnë në gatishmëri për situata të tjera emergjente. Situata ka përkeqësuar jetesën e shumë njujorkezëve, që tashmë përballen me vështirësi për shkak të kushteve të motit. Autoritetet lokale janë angazhuar për të ofruar ndihmën e nevojshme për ata që janë prekur nga këtë situatë.
