Një hetim intensiv i Seksionit për Hetimin e Trafiqeve të Paligjshme, në bashkëpunim me Prokurorinë e Tiranës, ka rezultuar në arrestimin e dy shtetasve dhe shpalljen në kërkim të një të treti, në kuadër të operacionit “Muzeu i errët”. Të arrestuarit janë A. H., 20 vjeç, dhe I. Gj., 30 vjeç, të dy banues në Kamzë, ndërsa në kërkim është J. H., 42 vjeç.
Sipas hetimeve, këta individë ishin organizuar në një grup kriminal, me qëllim trafikimin e objekteve me vlera historike dhe kulturore, të cilat ishin vjedhur në vende të ndryshme të Europës. I. Gj. ishte personi që siguronte kryesisht këto objekte, të cilat më pas trafikoheshin për t’u shitur në Shqipëri në kundërshtim me ligjin.
Gjatë kontrollit në banesën e A. H. dhe J. H. (babë e bir), u gjetën një sërë objekteve të vlefshme: 31 punime druri të gdhendura, 3 skulptura në formë dhëmbi elefanti, 6 piktura të autorëve të huaj, 411 albume me pulla poste të shteteve të ndryshme, një procesverbal origjinal nga Franca i vitit 1925, dhe disa objekte të tjera me vlera artistike e historike, si një shpatë metalike, një skulpturë shqiponje, dhe një valixhe druri me punime dekorative.
Hetimet vazhdojnë për kapjen e J. H. dhe për identifikimin e ndonjë shtetasi tjetër të implikuar në këtë veprimtari kriminale. Të gjitha materialet lidhur me këtë çështje janë dërguar në Prokurorinë e Tiranës për veprime të mëtejshme.
