Një përplasje e hapur midis dy aleatëve të NATO-s ndodhi të enjten në Ankara, gjatë vizitës së kancelarit gjerman, Friedrih Merz, në Turqi. Presidenti turk, Rexhep Tajip Erdoan, e kritikoi atë për “mosvëmendje ndaj gjenocidit dhe sulmeve të Izraelit në Gaza”. Gjatë një konference të përbashkët për media, Erdoan iu drejtua ashpër kancelarit, duke theksuar se Izraeli, me armët e tij, vazhdon të godasë Gazën ndërsa Hamas nuk disponon bomba të tilla.
Ai u shpreh: “A nuk e sheh Gjermania gjenocidin e Izraelit në Gaza? Izraeli gjithmonë ka synuar ta shtypë atë përmes urisë dhe gjenocidit.” Merz, nga ana tjetër, kritikoi disa nga veprimet e Izraelit dhe informoi se Gjermania ka pezulluar eksportet ushtarake drejt Izraelit për shkak të përkeqësimit të situatës humane, por nuk e mbështeti akuzën e gjenocidit. Ai theksoi se kritikat ndaj Izraelit nuk duhet të përdoren si pretekst për antisemitizëm.
Kancelari gjerman shprehu se “do të kishte mjaftuar vetëm një vendim për të shmangur një numër të madh viktimash të panevojshme”, duke sugjeruar se Hamas duhej të kishte liruar pengjet më herët dhe të dorëzonte armët. Ai shpresoi për një fund të luftës përmes një marrëveshjeje armëpushimi të ndërmjetësuar nga Shtetet e Bashkuara dhe të mbështetur nga Turqinë.
Në përgjigje të kritikave të Merz, Erdoan theksoi se nuk mund të pajtohej me qëndrimin e tij dhe se beson se Turqia dhe Gjermania mund të bashkëpunojnë për të luftuar urinë duke siguruar dërgimin e ndihmave humanitare në Gaza. Kjo situatë tregon tensionet dhe ndryshimet në qëndrim midis dy vendeve, që historikisht kanë qenë aleatë në NATO.
