Kryeministri Edi Rama mori pjesë në Forumin e Paqes në Paris, një nismë të presidentit francez Emmanuel Macron, ku bëri batuta me drejtuesin e intervistës. Gjatë bisedës, ai komentoi një gafë të Macron, i cili përmendi Shqipërinë në vend të Armenisë në kontekstin e marrëveshjes së paqes Armeni-Azerbajxhan. Rama korrigjoi këtë shumë me humor, duke theksuar rëndësinë e marrëveshjes për stabilitetin në rajon.
Duke folur për aktualitetin global, Rama ndau impresione nga Forumi për Nisma të Investimeve në Riyadh, ku mori pjesë së fundi. Ai theksoi nevojën për një reflektim më të thellë mbi pozitat e Perëndimit, veçanërisht Europës, në panoramën globale, duke e parë atë si të shushatur dhe të fragmentarizuar. Ai kritikoi idenë se Europiani ka legjitimitet moral për të gjykuar të tjerët dhe theksoi se ky qendrim është bërë gjithnjë e më i dëmshëm.
Rama shprehu shqetësim për mungesën e një plani europian për paqe, duke e quajtur situatën e tanishme të rrezikshme. Ai vuri në dukje se Bashkimi Europian ende e ka deleguar politikën e jashtme te Shtetet e Bashkuara, duke e lënë veten në “autopilot”. Sipas tij, ka një qasje binare ndaj konflikteve, e cila mund të ketë pasoja fatale.
Kur u pyet për mundësinë e një tëtiti me Rusinë, Rama theksoi se diplomacia është e nevojshme, pavarësisht nga qëndrimet e palëve, duke e krahasuar situatën me konfliktin mes Izraelit dhe Hamasit. Ai nënvizoi se ndonëse Rusia duket se dëshiron luftë, është e domosdoshme të hapen kanale bisedimi, përndryshe konflikti mund të ketë pasoja më të thella.
Në përfundim, Rama shprehu shqetësim për një Evropë që nuk e sheh seriozisht nevojën për një strategji më të qartë e koherente në politikën e saj të jashtme, duke theksuar se qasja e tanishme mund të jetë e rrezikshme për të gjithë.
