Pasditen e së mërkurës, Reali i Madridit publikoi një komunikatë zyrtare ku njoftoi se do t’i kërkojë dëmshpërblim UEFA për dëmet e shkaktuara nga çështja e Super League. Ky veprim vjen pas vendimit të Gjykatës së Madridit që hodhi poshtë apelin e FIFA dhe UEFA, duke konfirmuar se këto dy organizata kanë abuzuar me pozicionin e tyre dominues.
Sipas të përditshmes AS, shifra që do të kërkojë Reali, së bashku me A22, promotorin e Super League, pritet të arrijë në rreth 4.5 miliardë euro. Kjo shumë përfshin dëmin e shkaktuar, fitimin e munguar dhe dëmtimin e reputacionit. Avokatët e klubit dhe A22 kanë filluar punën për përgatitjen e kërkesës përkatëse.
Para kësaj, Reali i Madridit dhe A22 zhvilluan takime me UEFA për të arritur një marrëveshje, me qëllim zbatuar vendimin e Gjykatës Evropiane të Drejtësisë, por pa arritur sukses. Bisedimet në fillim zhvilloheshin mirë, veçanërisht për menaxhimin e kompeticionit, por dështuan në arritjen e një marrëveshjeje mbi formatin e këtij kompeticioni.
Më pas, Reali dhe A22 arritën në përfundimin se UEFA asnjëherë nuk kishte qëllim të arrinte një marrëveshje, por thjesht të fitonte kohë për të penguar krijimin e Super League. Tani, opsioni më i mirë për ta duket se është kërkesa për dëmshpërblim, e cila është në përputhje me politikat e Bashkimit Evropian në rastet e monopolizimit të tregut.
Ky zhvillim thekson tensionet e vazhdueshme midis institucioneve të futbollit dhe klubeve që kërkojnë të ndryshojnë formatin e kompeticioneve për të rritur transparencën dhe barazinë në sport.
