Një ndërtesë shtatëkatëshe është shembur mëngjesin e sotëm në provincën Kocaeli, veriperëndim të Turqisë, duke lënë pas të paktën pesë persona të bllokuar nën rrënoja. Ekipet e kërkim-shpëtimit janë angazhuar në vendngjarje dhe po punojnë intensivisht për të nxjerrë të mbijetuarit.
Guvernatori i Kocaelit, İlhami Aktaş, ka informuar se shkaku i shembjes nuk është përcaktuar ende, megjithatë ai theksoi se përpjekjet për shpëtimin e personave të bllokuar janë prioritet i parë. “Pesë anëtarë të një familjeje ndodheshin brenda ndërtesës në momentin e incidentit”, ka thënë ai.
Ministri i Brendshëm turk, Ali Yerlikaya, ka njoftuar se në operacionin e shpëtimit janë angazhuar 147 punonjës, përfshirë 80 efektivë, si dhe ekipe nga organizatat joqeveritare dhe bashkitë. Pjesë e operacionit janë gjithashtu tetë pajisje zbulimi, dy dronë dhe 52 automjete.
Hetimet paraprake sugjerojnë se shembja mund të jetë shkaktuar nga punime nëntokësore që ishin duke u kryer pranë godinës. Tashmë, ekipet vijojnë punën për të zbuluar të plotë shkaqet e kësaj fatkeqësie dhe për të siguruar ndihmën e nevojshme për ata që janë të prekur nga ngjarja.
