Një shtetas shqiptar, Gerald Cera, është dënuar me 6 vite burg në Mbretërinë e Bashkuar për falsifikim dokumentesh, në përpjekje për të ndihmuar tetë fëmijë shqiptarë të fitonin në mënyrë të paligjshme shtetësinë britanike. Cera, 28 vjeç, pjesëtar i një grupi kriminal, u shpall fajtor për konspiracion për ndihmën e imigracionit të paligjshëm gjatë periudhës nga shtatori 2022 deri në gushtin 2024.
Hetimet zbuluan se ai kishte dorëzuar aplikime duke pretenduar se ishte babai biologjik i tetë foshnjave dhe kishte përdorur fotografi të manipuluara dhe dokumente personale si pasaportën dhe certifikatën e natyralizimit. Pagesat për aplikimet ishin realizuar përmes kartave bankare dhe adresave të emailit që mbanin emrin e tij.
Gjyqi në St Albans Crown Court e vlerësoi mashtrimin si një skemë me “nivel të lartë planifikimi dhe sofistikimi”. Përveç dënimit me burg, Cera humbi edhe shtetësinë britanike sipas vendimit të Ministrisë së Brendshme. Të gjitha pasaportat e fëmijëve në fjalë janë anuluar nga autoritetet britanike.
Cera ishte në miqësi me Petrit Musa, një tjetër shqiptar që gjithashtu pranoi fajësinë për raste të ngjashme të mashtrimit me pasaporta për fëmijë. Ai u arrestua në aeroportin e Lutonit më 16 shkurt 2025 dhe u dënua për mosbashkëpunim pasi refuzoi të jepte kodet e aksesit për telefonin dhe laptopin e tij.
Prokurorja Roma Karampatsi theksoi se rrëfimet e tij gjatë hetimit ishin “plot kontradikta” dhe që veprimet e tij cenonin integritetin e sistemit të imigracionit britanik, duke dëmtuar ata që përpiqen të hyjnë ligjërisht në vend.
Ministri britanik për Sigurinë e Kufijve dhe Azilin, Alex Norris, shprehu mbështetje për dënimin, duke theksuar se kjo tregon që çdo përpjekje për të manipuluar kufijtë britanikë do të hasë në drejtësi.
