Papa Leoni XIV ka dërguar një mesazh të fuqishëm në përfundim të takimit ndërfetar të Shën Egjidit, duke theksuar se “lufta nuk është kurrë e shenjtë”, ndërsa “paqja është e shenjtë”. Ai shprehu shqetësimin për konfigurimin aktual global, duke u fokusuar në lodhjen e njerëzve nga luftërat dhe nevojën për një epokë të fortë pajtimi.
Papa nënvizoi se bota ka “etje për paqe” dhe kërkon përfundimin e shtypjes, forcës dhe indiferencës ndaj drejtësisë. Ai kujtoi pasojat e dhimbshme të luftërave, përfshirë numrin e lartë të vdekjeve dhe shkatërrimit, duke theksuar se lutja është një forcë e madhe për pajtim. “Ata që nuk luten abuzojnë me fenë dhe arrijnë në aktin e vrasjes,” theksoi ai, duke kërkuar që të përfundojnë thirrjet dhe sloganet që përshkruajnë krijesat e Zotit si armikë.
Në këtë ceremoni, mbajtur në Koloseum, Papa gjithashtu ështe ndalur në fjalët e Papa Françeskut, duke e theksuar rëndësinë e shmangies së përdorimit të feve si mjete për të nxitë nacionalizmin dhe gjithashtu rrezikun e ndarjes etnike dhe populizmit. Ai apeloi politikanët që të punojnë për paqen dhe të kenë parasysh përgjegjësinë që kanë për çdo tension apo konflikt që ndihmojnë në nxitje.
Me këtë mesazh, Papa synon të inkurajojë një angazhim më të madh nga të gjithë liderët dhe besimtarët për të kontribuar në krijimin e një bote më paqësore dhe më të drejtë. Ai u bëri thirrje të gjithëve për të ndihmuar në ndalimin e luftërave, duke rikujtuar se Zoti do t’i mbajë përgjegjës ata që nuk kanë kërkuar paqen. Papa përfundoi me shpresën se lutja mund të ndryshojë historinë e popujve dhe të kontribuojë në një të ardhme më të mirë.
