Tensionet në Rripin e Gazës janë përshkallëzuar sërish pas një urdhri të Kryeministrit izraelit Benjamin Netanyahu për të realizuar “sulme të menjëhershme dhe të fuqishme” ndaj forcave të Hamasit në qytetin e Rafahut, në jug të enklavës. Ky vendim pason shkëmbime zjarri, ku militantët e Hamasit kanë qëlluar me snajperë dhe raketa antitank ndaj forcave të IDF-së (Forcat e Mbrojtjes së Izraelit), sipas gazetës Haaretz.
Qeveria izraelite e ka vlerësuar këtë incident si një “shkelje të rëndë të armëpushimit” nga ana e Hamasit. Për të analizuar situatën dhe për të vendosur hapat e ardhshëm ushtarakë, Netanyahu thërriti një mbledhje urgjente sigurie. Situata përkeqësohet më tej pas vrasjes së dy ushtarëve të IDF-së në Rafah, për të cilën ushtria akuzoi Hamasin, ndonëse grupi palestinez ka mohuar çdo përfshirje.
Në një zhvillim të veçantë, Times of Israel raportoi se Hamasi ka dorëzuar arkivolin e një pengu izraelit, i gjashtëmbëdhjeti nga 28 që kërkohen nga Tel Avivi. Megjithatë, burime zyrtare konfirmuan se trupi i këtij pengu ishte kthyer më herët në Izrael, çka ka krijuar konfuzion mbi qëllimin e veprimit simbolik të Hamasit.
