Juventusi duket se ka gjetur pasuesin e Igor Tudor në pankinë. Ish-trajneri i përfaqësueses italiane, Luciano Spalletti, është kandidati kryesor. Shefi Ekzekutiv i Juventusit, Comolli, do të takohet me Spalletti, duke i propozuar një kontratë deri në muajin qershor, me mundësi rinovimi automatik nëse skuadra arrin të kualifikohet për në Ligën e Kampioneve për sezonin e ardhshëm.
Klubi dëshiron që rinovimi të jetë për një vit, ndërsa Spalletti pritet të kërkojë dy vjet. Pavarësisht kësaj, drejtuesit e Juventusit kanë mësuar nga rastet e fundit dhe po tregohen të kujdesshëm për të shmangur situatat ku janë të detyruar të paguajnë trajnerë edhe pas shkarkimeve, siç ndodhi me Thiago Mottën.
Pas problemeve në stolin e Tudor, drejtuesit e Juventusit e kishin vënë në plan ish-trajnerin Spalletti, fillimisht me një sondazh, por pa bërë një ofertë konkrete. Pas dështimit me Napolin, Spalletti ndryshoi mendje për të rikthyer karrierën e tij në nivele të larta, dhe Juventus mund të ishte një mundësi e mirë për të.
Spalletti ka një vlerësim pozitiv për skuadrën bardhezi dhe është i bindur se mund ta ndihmojë Juventusin të rigjenerojë ambiciet e tij, me objektivin kryesor për momentin një vend në Ligën e Kampioneve dhe arritjen në playoff e këtij kompeticioni për sezonin aktual. Juventus synon të ketë Spalletti në stol për ndeshjen e së shtunës ndaj Cremoneses. Marrëveshja pritet të ratifikohet këtë të martë, dhe nëse nuk ka surpriza, do të bëhet zyrtare.
Nëse negociatat prishen papritur, alternativa më logjike për Juventusin do të ishte trajneri Palladino, megjithatë kjo mbetet një mundësi e largët për momentin.
