Uragani “Melisa”, i cili është shpallur stuhia më e fortë në botë për këtë vit, po shkakton dëme të mëdha në Karaibe. Deri tani, tre persona kanë humbur jetën në Xhamajkë dhe katër viktima janë raportuar në Haiti dhe Republikën Dominikane. Me shpejtësi erash që arrin deri në 282 km/orë, “Melisa” klasifikohet si uragan i kategorisë pesë, niveli më i lartë i intensitetit.
Meteorologët amerikanë paralajmërojnë për pasoja serioze dhe kërcënuese për jetën e banorëve në zonat e prekuara. Autoritetet pohojnë se uragani pritet të intensifikohet më tej dhe të arrijë në ishujt Karaibe, duke rritur frikën e katastrofave natyrore.
Një nga shqetësimet kryesore është ritmi i ngadaltë i lëvizjes së “Melisës”, i cili po shkakton shi të rrëmbyeshëm në disa zona, duke rritur rrezikun e përmbytjeve vdekjeprurëse dhe rrëshqitjeve të dheut. Qeveria ka ndërmarrë masa paraprake për të mbrojtur qytetarët, duke vënë në dispozicion rreth 881 vend-strehime, të cilat janë falas për të prekurit nga stuhia.
Situata e krijuar nga uragani “Melisa” mbetet kritike dhe autoritetet po ndjekin zhvillimet me vëmendje, duke kërkuar të minimizojnë ndikimin e saj në jetën e përditshme të banorëve.
