Një tërmet me magnitudë 6.1 ballë goditi sot zonën e Sındırgı në Balıkesir, duke u ndjerë fuqishëm në disa provinca të Marmarasë dhe Egjeut, përfshirë Stambollin, Izmirin, Bursën, Tekirdağun, Kocaelin dhe Sakaryan. Sipas Autoritetit për Menaxhimin e Fatkeqësive dhe Emergjencave (AFAD), tërmeti ndodhi në një thellësi prej 5.99 kilometrash.
Ministri i Brendshëm, Ali Yerlikaya, njoftoi se nuk ka pasur raportime për viktima, megjithatë tre ndërtesa të papërdorura dhe një dyqan janë shembur. Dy persona kanë kërkuar ndihmë mjekësore, dhe në disa zona të Sındırgı janë raportuar dëmtime të pjesshme në godina.
Si masë paraprake, shkollat në Balıkesir janë mbyllur përkohësisht. Ekipet e AFAD-it, së bashku me institucionet lokale, kanë filluar kërkimet dhe vlerësimet në terren për të përcaktuar dëmet dhe nevojat e qytetarëve të prekur. Guvernatori i Balıkesir, İsmail Ustaoğlu, deklaroi se të gjitha ekipet janë në gatishmëri për të ofruar mbështetje.
Po ashtu, Guvernatori i Qarkut Sındırgı, Doğukan Koyuncu, theksoi se deri tani nuk ka raportime për viktima në fshatra, por puna në terren vazhdon. ndërtesat e shembura përfshijnë dy godina katërkatëshe në Rrugën Akhisar, të cilat ishin evakuuar dhe vulosur më parë për shkak të dëmtimeve nga një tërmet i mëparshëm më 10 gusht, si dhe një ndërtesë dykatëshe në Sheshin Cumhuriyet, ku ndodheshin tre dyqane në katin përdhes.
Aktualisht, autoritetet po monitorojnë situatën dhe janë në gatishmëri për çdo zhvillim të ri.
