Të rrisësh një fëmijë në Shqipëri është një proces që sjell kosto të konsiderueshme, me një shpenzim mesatar prej rreth 27 mijë lekësh në muaj. Sipas anketës së buxhetit të familjeve, çiftet pa fëmijë shpenzojnë rreth 79 mijë lekë, ndërsa ata me një fëmijë e arrijnë këtë shifër në 106 mijë lekë. Kështu, duket se kostot për një fëmijë përbëjnë rreth 30 mijë lekë, afërsisht sa një pagë minimale.
Këto shifra, siç tregon INSTAT, janë rritur ndjeshëm gjatë viteve të fundit. Para gjashtë vitesh, kostoja ishte 17 mijë lekë, ndërsa pas pandemisë, shpenzimet u rritën në 26 mijë lekë në 2022 dhe arritën në 27 mijë lekë për këtë vit.
Shpenzimet për rritjen e një fëmije ndryshojnë sipas qarqeve, me Tiranën që ka kostot më të larta, e ndjekur nga Korça dhe Durrësi, ndërsa Kukësi ka shpenzimet më të ulta. Aktualisht, shqiptarët dedikojnë rreth 39.6% të totalit të shpenzimeve për ushqim, qira, ujë dhe energji, duke lënë një pjesë më të vogël për arsimin dhe shëndetin. Kjo tregon se përballë këtyre shpenzimeve, rritja e fëmijëve bëhet edhe më e rëndë, sidomos për familjet me më shumë se dy fëmijë.
Përveç faktoreve ekonomikë, lindshmëria dhe indeksi i fertilitetit në Shqipëri kanë pësuar rënie të konsiderueshme, duke reflektuar vështirësitë që përballen familjet për të pasur fëmijë. Shpenzimet e larta per të rriturit një fëmijë edhe shumë më tepër se shifrat zyrtare të raportuara, duket se kanë një ndikim të madh në vendimet e familjeve për krijimin e një brezi të ri.
Në përgjithësi, rritja e çmimeve ka bërë që shumë familje të rishikojnë planet e tyre për të pasur fëmijë, duke e bërë kështu temën e shpenzimeve sociale dhe ekonomike një nga shqetësimet kryesore të shoqërisë shqiptare.
