TIRANA– Në Gjykatën e Posaçme pritet të zhvillohet sot seanca paraprake për çështjen penale që përfshin ish-kryebashkiakun e Tiranës, Erion Veliaj, bashkëshorten e tij Ajola Xoxa, si dhe disa persona të tjerë të hetuar në të njëjtën dosje. Gjatë kësaj seance, trupi gjykues do të shqyrtojë akuzat e ngritura nga SPAK dhe do të vendosë nëse çështja do të kalojë për gjykim të plotë apo do të rikthehet për hetime shtesë.
Veliaj ndodhet në paraburgim që prej 10 shkurtit, pas vendimit të Gjykatës së Posaçme për masën e sigurisë “arrest në burg”.
Seanca e mëparshme u shty për shkak të bojkotit të avokatëve, pas arrestimit të avokatit Ulian Barjami, i cili ishte përfshirë në një përplasje me një prokuror gjatë një seance në Gjykatën e Elbasanit.Më herët, më 2 tetor, Gjykata e Lartë rrëzoi kërkesën e Veliajt për zëvendësimin e masës së sigurisë me një më të butë.
Sipas hetimeve të SPAK, Veliaj dhe bashkëshortja e tij dyshohet të kenë ngritur një skemë korrupsioni dhe pastrimi parash, përmes së cilës kanë përfituar rreth 1 milion euro. Këto të ardhura, sipas prokurorisë, janë siguruar nga fondet e Bashkisë së Tiranës dhe nga ryshfete të marra prej biznesmenëve kontraktorë, përmes një rrjeti kompanish dhe organizatash jofitimprurëse.
SPAK pretendon se një pjesë e shumës është përdorur për blerje luksoze online nga Ajola Xoxa, ndërsa hetimet për këtë dosje janë ende në vijim.
