Ministrja për Europën dhe Punët e Jashtme, Elisa Spiropali, u takua në Bruksel me Zëvendës Presidenten e Komisionit Europian, Kaja Kallas, për të diskutuar angazhimin e Shqipërisë si një faktor i sigurisë rajonale dhe partner i besueshëm i Bashkimit Europian. Takimi kishte si fokus mbështetje të vazhdueshme për Ukrainën dhe linjëzimin e vendit me politikat e BE-së.
Spiropali shprehu bindjen se integrimi i Ballkanit Perëndimor në BE, përfshirë Kosovën, është një investim strategjik për të ardhmen e përbashkët europiane. Kallas, nga ana e saj, vlerësoi Shqipërinë për ndjekjen e plotë të politikave të jashtme të BE-së dhe angazhimin e saj serioz në procesin e negociatave.
Ministrja gjithashtu falenderoi Kallas për dy paketat e ndihmës financiare, që kapin shumën prej 28 milion eurosh, të cilat do të shërbejnë për fuqizimin dhe modernizimin e forcave të armatosura shqiptare.
